الرئيسية / تطوير الذات / عشان ثقتك فى نفسك تزيد

عشان ثقتك فى نفسك تزيد

١٢ نصيحة عشان ثقتك في نفسك تزيد..
ذاكريهم و اعملي Save للمقال دا و ارجعي له كل ما تحتاجي..

١- اقرأي كتير، مش روايات اقرأي في مجالات مختلفة و في أكتر من حاجة، كل ما معلوماتك تزيد كل ما هتعرفي تتكلمي لأن دماغك مبنية مش هشة و فاضية!
٢- اهتمي بشغلك..
شغلك هو ذاتك لأنك لو قدرتي تثبتي نفسك فشغلك هتقدري تثبتي نفسك في أي حاجة … و ننصحك هنا إنك تركزي كويس في المجال إللي هتختارية عشان قرار تغيره بيغير في ميزان الثقة.
٣- العبي رياضة لأن شكل جسمك هيفرق في جسمك و في نفسيتك و دا هيزود ثقتك في نفسك بشكل كويس جداً!
٤- خليكي عاقلة و إنتي بتتقبلي النقد، عصبيتك و صوتك العالي غالبا هيضعفوا موقفك فركزي كويس إيه النقد إلّي يستدعي تهتمي بيه – كنقد بناء – و إيه مش مستدعي يشغل بالك.
٥- اتعلمي تسكتي وقت الضرورة!.. مش كل كلمة – تعليق – نقد – موقف يستدعي ردك بالعكس السكوت بيعزز الثقة و بيخليكي تعرفي تتصرفي احسن.
٦- اعرفي نقط ضعفك و ابدأي عالجيها، مش لازم تقوليهم لحد بس بينك و بين نفسك اعرفي مشاكلك و حليها لنفسك و خليكي عارفة إن مفيش حد أحسن من حد كلها مجرد فروق فردية!
٧- متحاربيش في أكثر من جبهة متناميش بليل و تصحي تقرري تغيري حياتك، الموضوع خطوات و غالبا بتاخد شوية وقت و ده طبيعي فمتجيش على نفسك علي طول.
٨- لازم تتقبلي فكرة إن مش كل الناس هتحبك – دا طبيعي – لإن مش كل الناس إنتي هتقدري تحبيهم، البرتقال نصه حلو و التفاح كمان بس الاتنين ممكن ميكملوش بعض.
٩- اهتمي بنفسك و مظهرك و شكلك، دا هيفرق جدا في ثقتك بنفسك.
١٠- بلاش تكوني مُصرة تتعاملي مع ناس انتي حاسة إنهم مش مُتقبلينك، متخديش ده علي اعصابك، اخلقي لنفسك مساحة مريحة من الأفراد – Comfort zone – و بعد كده كبريها متستسلميش لفكرة إن ” الناس بتعاملني – بتبصلي – وحش ”
١١- اتعلمي تاخدي حقك، مش بالزعيق و الخناق بالإحترام و العقل و بأنك متكونيش ضعيفة و مكسورة.
١٢- اخيراً اوعي تخلي أي حاجة حصلت و كسرتك قبل كده تكون سبب أو علامة تقلل ثقتك، أي شئ فالماضي مش في إيدينا، لازم تتخطيه و تبصي للمستقبل يا جدعة – و خليكي فاكرة – إنتي حلوة زي ما إنتي.
اجمدي و متخافيش

عن فريق انتربرنيل

شاهد أيضاً

“مهارات من Google” مبادرة جديدة لرائدات الأعمال .

فرصة جديدة لرائدات الأعمال || اطلقت Google مبادرة جديدة وهي “مهارات من Google” واللي من …

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *