الرئيسية / تطوير الذات / 15 نصيحة عشان تتعلمى أي مهارة

15 نصيحة عشان تتعلمى أي مهارة

كتير بنحط هدف قدامنا أننا نتعلم مهارة جديدة وبنبدأ وبعدها بنوقف ونكسل نكمل!
عشان تكملي، دول أهم ١٥ نصيحة عشان تقدري تتعلمي مهارة معينة بسرعة ومتوقفيش <3

١- حددي هدفك
ليه عاوزة تتعلمي المهاردة دي؟
“تترقي في شغلك .. تنقلي لشغل جديد .. أو تطوري من نفسك” اكتبي كل الأسباب في ورقة والزقيها قدامك.

٢- حطي لنفسك Deadline
هتتعلمي الكورس أو المهارة دي في وقت قد إيه؟ شهر أو إتنين ؟ وهتبدأي امتى؟ ولمدة كام يوم وكام ساعة؟
اكتبي هدف واقعي ..تقدري تحققيه وخليه قدامك ديماً فيCalendar

٣- إنك تكتسبي مهارة جديدة مش اسطورة
لو عاوزة تتعلمي ترسمي مش لازم تكوني فنانة من يوم ما جيتي للدنيا 😀
اتعلمي وابدئي من دلوقتي وهتوصلي 😉

٤- اعملي Search
قبل ما تبدأي تتعملي مهارة جديدة مش أول كورس يقابلك تذاكريه !
اقرأي الأول الReviews بتاع الكورس ومحتواه وشوفي كورسات تانية وقارني المحتوى والفروق بين الكورسات
ممكن تشوفي فيديوهات على الYoutube أو تقرأي مقالات أو تسالي على Qoura وهتلاقي إجابات تفيديك، أو اسألي حد بدأ من زمان في المجال واستفيدي من خبرته ، متخليش الموضوع يعدي يومين بالكتير عشان متكسليش.

٥- قسمي المهارة
كل مهارة أو علم جديد هتدخليه بيتقسم لمجموعة مهارات تانية
يعني لو هتتعلمي Social Media محتاجة تتعلمي ازاي تكتبي محتوى ، وتعملي Edit بسيط للصور ، وتتعلمي Marketing
ومجموعة مهارات تانية ، اعرفي المهارة إللي بتتعلمها بتتكون من إيه وابدئي بالأكثر أهمية في البداية، والباقي بييجي بالممارسة.

٦- ابدئي دلوقتي
لو عملتي search وسألتي وعرفتي هتبدأي ازاي يبقى لازم تبدأي حالاً متأجليش لبكرة.

٧- مارسي كتير
كل ما تتعلمي حاجة لازم تطبقي عليها كتير،خصصي وقت للمذاكرة ووقت للتطبيق عشان متنسيش اللي اتعلمتيه وده هيساعدك تثبتي اللي اتعلمتيه بشكل أفضل.

٨- خصصي وقت لنفسك
العبي رياضة أو اخرجي أو اي هواية بتحبيها مارسيها ، المهم مينفعش تقضي اليوم كله بتتعلمي حاجة واحدة لأنك مع الوقت هتزهقي وتحسي بملل وتبطلي تتعلمي.

٩- اختاري مكان مناسب تتعلمي فيه
لو مبتعرفيش تركزي في البيت ممكن تنزلي تشتغلي وتذاكري في اي Work space
المهم تبعدي عن اي حاجة بتشتتك.

١٠- دوري على Mentor ليكي
عشان تعرضي عليه كل حاجة جديدة بتعمليها ويقولك رأيه والFeed back بتاعه ، أو ممكن تطوعي في أي كيان تنموي وهيكون ليكي mentors بيراجعوا ليكي شغلك، أو ممكن تتعرفي عليه من خلال حضورك لEvents او Workshops.

١١- اغلطي كتير
انتي لسه بتتعلمي فلازم تتقبلي فكرة إنك هتغلطي كتير في الأول، وخلي عندك يقين أن غلطاتك في البداية هي اللي هتوصلك للأحتراف في النهاية.

١٢- مارسي مهارتك في كل وقت وحوليها لهواية
لو بتتعلمي تصوير، طول الوقت معاكي موبايلك صوري بيه، لو بتتعلمي إنجليزي فكري طول الوقت بالإنجليزي حتى لو بينك وبين نفسك، لو بتتعلمي سوشيال ميديا شوفي أي بوست قدامك وفكري لو كنتي مكانه كنتي هتفكري توصلي فكرتك ازاي؟ المهم طول الوقت تمارسي.

١٣- انضمي لCommunity مهتم بنفس مهاراتك
التعامل مع ناس من نفس مجالك هيخليكي تتعلمي أسرع وتعرفي كل حاجة جديدة عن المهارة اللي بدأتي فيها.

١٤- حوليها للعبة
مبدأ الـGamification من الحاجات الممتعة جدا في أي شغل، قسمي مهاراتك لLevels مختلفة وكل واحدة فيهم عبارة عن شوية نقاط وحطي لنفسك جوايز عند كل مرحلة، يعني لما تخلصي أول مرحلة هتسافري رحلة او هتعزمي نفسك على حاجة بتحبيها أو هتنزلي السينما مع اصحابك، حطي الحاجات اللي بتحبيها كمكافأة ليكي لما تخلصي الTask اللي عليكي.

١٥- حياة جديدة
مهارة جديدة يعني هتدخلي حياة جديدة وتتعاملي مع ناس مختلفة وتخلقي لنفسك عالم جديد فأنتي الوحيدة المسؤولة إنك تبدأي قصة جديدة أو تفضلي مكانك !

عن فريق انتربرنيل

شاهد أيضاً

“مهارات من Google” مبادرة جديدة لرائدات الأعمال .

فرصة جديدة لرائدات الأعمال || اطلقت Google مبادرة جديدة وهي “مهارات من Google” واللي من …

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *