الرئيسية / تطوير الذات / موهبتك رأس مالك

موهبتك رأس مالك

أولاً محدش مش موهوب … كل واحدة عندها موهبة معينة قد تبدو تافهه للبعض و لكن مهما كانت فممكن تحويلها لحرفة أو مهنة تجيبي منها مصدر دخل … حتي لو كانت غسيل الصحون !
غسيل الصحون ممكن يكون فكرة لمشروع تشغيل عاملات و الربح من خلال السمسرة … قوة موهبتك و تفكيرك؛ هو أساس نجاحك.
عشان كده بننصحك تشوفي فيلم The Internn اللي فيه البطلة حولت حبها للملابس لمتجر الكتروني و عشان هي “موهوبة” عرفت تحقق ارباح خيالية … شوفي الفيلم!
ثانياً طوري موهبتك … الموهبة شئ بنتولد به لكن تطويره ده دورك و مسؤليتك إنتي … لو مهتمتيش و طورتي مهاراتك متلوميش غير نفسك لأننا مش عايشين في المدينة الفاضلة … محدش هيساعدك لو مساعدتيش نفسك أولا، لأن حتي أقرب المقربين هيكون عنده أولويات!
خليكي أولوية نفسك.ثالثاً فكري كويس جداً في ما ينقص موهبتك … غير العنصر المادي لأن ده مش عقبة، العقبة .. المعضلة الحقيقية في الفكر. افتكري دايماً إن الافكار الكويسة و المختلفة هي إللي بتعمل الفلوس مش العكس … بصي حواليكي هتفهمي كلامنا و هتصدقيه! كام حد بدأ من جراج أو كان معنف أسرياً او .. او .. أو و قدر ينجح و يعمل ملايين.

رابعاً ابعدي عن المحبطين البائسين و دائمي الاكتئاب لأن دول مصدر ضغط نفسي عليكي طول الوقت _ده لا يمنع تقديم الدعم وقت ما تقدري_ و لكن بحذر … غالبا الخوض في مشاكلهم هيخلي تفكيرك مشتت بين حياتك الشخصية و شغلك و مستقبلك و هنا هنأكد عليكي ضرورة الفصل الكلي بين الحياة الشخصية و الإجتماعية و شغلك.

خامساً مهما كانت قدراتك بسيطة فإيمانك بقوة موهبتك و فكرتك كفيلة إنها تدعمك.

سادساً قبل ما تفكري تبدأي مشروعك أو تنفذي فكرتك لازم تكوني محددة مصاريفك كلها و مصدر دخلك … “ده أول شئ تكوني محدداه و كتباه بالورقة و القلم” … هتكسبي ازاي ؟! و دا بيتطلب منك دراسة كويسة و جيدة جداً للسوق المحيط ليكي و القريب من المجال إللي هتشتغلي فيه.

سابعاً مرتبط بسادساً و هو ما يسمي بالــBusiness Model Canvas أو نموذج العمل .. باختصار هو دراسة كل أبعاد المشروع سواء شركاء موردين مصادر دخل و صرف …إلخ. ننصحك تـGoogle كلمة BMC او Business Model Canvas و هيظهر لك شيت فيه كل البنود ابدأي ذاكريها و اشتغلي عليها و ارجعي لنا لو احتاجتي مساعدة.

ثامناً انقذي نفسك قبل البدء في إنقاذ العالم … متشتتيش نفسك ,و كوني أنانية … ودا مش معناه التخلي أو البعد عن الناس و لكن حبك لنفسك و تعزيزك ليها هيكون سبب كافي يخليكي تدركي أهمية استقلالك بمشروعك أو موهبتك و هيديكي سبب كافي للنجاح.

تاسعا اوعي تيأسي لأن ده من اكثر الاسباب انتشاراً .. يأسك مش هيوقفك مكانك بس .. بالعكس ده هيرجعك لورا و هيصيبك بإنتكاسة غالباً ما تكون طويلة المدي و التأثير.

عاشراً و أخيراً ابدأي دلوقتي أفضل بكتير من بكرة.

بالتوفيق || مقال معاد نشره ||

 

عن فريق انتربرنيل

شاهد أيضاً

“مهارات من Google” مبادرة جديدة لرائدات الأعمال .

فرصة جديدة لرائدات الأعمال || اطلقت Google مبادرة جديدة وهي “مهارات من Google” واللي من …