الرئيسية / رياده اعمال / يعني ايه “تسويق” ؟

يعني ايه “تسويق” ؟

“يعني ايه تسويق Marketing وهل هو مهم لمشروعي ولا لا ؟”

انتي اللي هتقرري بنفسك اذا كان التسويق مهم لمشروعك ولا لأ بعد ما تقرأي المقال ده كويس

التسويق ببساطة هو انك تحددي العملاء اللي انتي هتبيعي ليهم المنتج/الخدمة بتاعتك وتحددي احتياجاتهم اللى منتجك/خدمتك هيلبيها وتحددي كمان ازاي هتلبي الاحتياجات دي وبأي طريقة.

فى ٣ خطوات هتبدأي بيهم التسويق لمشروعك وبيتسموا STP :

تقسيم السوق “Segmentation” : أول حاجة بتحددي السوق اللي هتقدمي فيه منتجك/ خدمتك و بتقسميه لشرائح أو فئات Segments ،كل فئه بيكون ليها صفات واحتياجات مشتركه و ممكن تقسيمه بكذا طريقة فيه تقسيم على أساس جغرافي أو على اساس السن، النوع،الوظيفة أو على أساس المستوي الاجتماعي.
الأستهداف “Targeting “:بعد ما قسيمتي السوق بتاعك لشرائح كتيرة دلوقتي جه دور انك تحددي أي شريحة هتستهدفيها لأن ببساطه انتي مش هينفع تقدمي منتج/خدمة ترضى بيها كل الشرائح أو الفئات فى نفس الوقت، الأفضل انك تختاري شريحة واحدة أو اتنين من السوق وتدرسيها كويس لأن العملاء بتوعك هم أهم عنصر فى مشروعك.
وضعك/صورتك فى السوق”Positing” : أكيد انتي درستي السوق كويس وعرفتي لو فيه منافسين بيقدموا نفس منتجك/ خدمك ولا لأ ، طب لو فيه منافسين ازاي انتي تتميزي فى السوق عنهم وا زاي ترسمي صورة مختلفة جوا عقل العملاء بتوعك وتحددي القيمة التنافسيه بتاعتك ولازم تظهري ده بشكل واضح لعملائك المستهدفين.
فى التسويق بنركز على ٤ عناصر أساسية واللي بنسميهم” المزيج التسويقي ” أو ال4 Ps:

المنتج Product : فى الجزء ده بتحددي تعريف منتجك/خدمتك وشكلها ومواصفاتها وهى بتلبي أنهي احتياجات عند عملائك بالظبط.
السعر Price : هنا هتحددي هتبيعي المنتج أو الخدمة بسعر ايه علشان يناسب فئه العملاء المستهدفين وكمان هتحددي أنهي خطة سعر هتتبعيها.
الترويج Promotion : هتحددي فى الجزء ده هتسوقيه لمنتجك/خدمتك ازاى مثلا عن طريق إعلانات و لا حملات تسويقية وهتختاري قنوات الاتصال إذا كانت أونلاين من خلال الانترنت ولا أوفلاين من خلال اعلانات مطبوعة أو هتشاركي فى معارض ومؤتمرات مثلا .
المكان Place : هتبيعي المنتج/الخدمة بتاعتك فين؟ لازم يكون مكان يناسب عملائك المستهدَفين ويقدروا يستفيدوا من خدمتك او يشتروا منتجك بسهولة.
وفيه كمان Ps 3 زيادة بتخدي بالك منهم لو بتقدمي خدمه مش بتبيعي منتج زي :

الموظفين People: مهم قوى تحددي طبيعية الناس اللي هتقدم الخدمة لانك ممكن تعملي كل حاجة بس اللي بيقدم الخدمة يجي ويبوظ كل ده فى ثانية من طريقة معملته وأسلوبه.
العملية البيعية Process: هل الخطوات اللي العملاء بيتبعوها علشان يخدوا الخدمة غير مفهومة أو صعبه ومتعبه ولا لأ علشان ده مهم جدا انى أخد بالى منه وأحددوا من الاول.
الدليل المادي ” physical evidence”: علشان أنتي بتقدمي خدمة لازم تحددي طبيعة المكان اللي بيتقدم فيه الخدمة و شكل الفاتورة والتعليمات اللي عليها مثلا .
تبعينا علشان تعرفي أكتر عن التسويق وازاي تعملي خطة تسويق ناجحة لمشروعك 😉

مشاركه من || نيرمين النمر .

#انتي_تقدري #في_ضهر_بعض

عن فريق انتربرنيل

شاهد أيضاً

6 أنواع من الموظفين الذين يعملون عن بعد كل روّاد الأعمال يعرفونهم!

العديد من الشركات تُفضل أن يعمل موظفيها من خلال المكتب، وذلك لعدة أسباب منها أن …

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *