الرئيسية / افكار جديده / هل عصّفتي ذهنك اليوم ؟ (;

هل عصّفتي ذهنك اليوم ؟ (;

كرائدة أعمال أو فرد في فريق عمل أوقات كتير بيكون مش سهل انك تطلعي فكرة مبتكرة و مبدعة و بتكوني مش قادرة تركزي بس جربتي قبل كده طريقة العصف الذهني؟

العصف الذهني Brain Storming : هي طريقة فعالة جدا للتفكير من غير حدود ,ممكن تستخدميها مع مجموعة من الأفراد كمان عشان بتخليكي تضاعفي افكارك و بتلاقي حلول و افكار افضل كمان .
و بيتكون من ٣ اجزاء :
أولاً: تحضير الجلسة :

١- حددي الهدف المطلوب من جلسة العصف الذهني :لازم تكوني عارفة ايه اللي عايزة تطلعي بيه و تحددي هل انتي عايزة تعملي مثلا نموذج خطة العمل أو تعملي منتج جديد خالص أو تلاقي حل لمشكلة موجودة، و من أهم الحاجات انك لازم تكوني واضحة و تركزي علي حاجة واحدة عشان ماتتشتتيش

٢-أوجدي نقطة بداية : حتي لو فكرتك مش كاملة أو مش دارسها من كل الجوانب لازم تختاري نقطة واحدة تبدأي بيها، يعني مثلا لو انا الفكرة بتاعتي هتحل مشكلة هشوف ايه اسباب المشكلة و احلها إزاي بطرق مبتكرة و عادي إنك تفكري بطريقة مجنونة ممكن تبقى حقيقة في يوم .. ماتستهونيش بأي فكرة عندك مفيش فكرة وحشة و لو معاكي فريق عمل و بتفكروا في حاجة محددة هتوصلوا لنتائج اسرع و الفكرة هتجيب فكرة و هتطوروا منها.

٣-قرري ايه اللي عايزاه من فكرة العمل: نقطة البداية مش بتشرط ان يكون عندك مشروع كبير بالعكس ممكن يكون عشان هدفك إنتاج منتج مميز بيفيد الناس و يساعدهم في حياتهم , ده ممكن يكون مش سهل في البداية بس بيفتحلك السكة للأفكار اللي ممكن تيجي ليك و دي ملهاش حدود.

٤- اقعدي اتكلمي و فكري مع مجموعة مش شرط تكون طريقة تفكيرهم زيك . العصف الذهني الناجح بيجي من التفكير مع ناس طريقه تفكيرهم مختلفة عنك , عندهم خبرات . ده هيساعد انهم يشوفوا فكرتك من وجهة نظرهم و ساعتها هتعرفي ايه الي ناقص مثلا في فكرتك و تعدليه.
ممكن كمان تستخدمي طريقة العصف الذهني مع خبراء في المجال اللي فيه فكرتك و بكده هتعرفي تقيمهم لفكرتك و تستفيدي منه و تطوري نقاط الضعف .
٥- حددي المكان : لأن أهمية المكان من أهمية الافراد اللي هتختاريهم بالظبط .. لازم يكون المكان بعيد عن اي دوشه و هادي جدا عشان يساعدكم علي التركيز بعد كده ابعدي أي جهازالكتروني .. كل واحد ممكن النوت بتاعته و يبدأ يفكر لوحده .. و ممكن كمان يبقي فيه مشروبات مثلا زي القهوة عشان الاشخاص اللي ممكن يحتاجوها.

و بكده هتقدري تتطلعي بأفكار جديدة و مختلفه مع فريق عملك.. جربيها و احكيلنا تجربتك (;
و استنينا هنكتب باقي أجزاء طريقة العصف الذهني و إزاي تخرجي منها بأفكار جديدة.

مشاركة من || مها عوض الله

#انتي_تقدرى #في_ضهر_بعض

عن فريق انتربرنيل

شاهد أيضاً

اتعملي لغة جديدة Online

عشان تتعلمي لغة جديدة مش محتاجه سنين، “جوش كوفمان Josh Kaufman” أثبت العكس لما اتعلم …

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *