الرئيسية / افكار جديده / اتعملي لغة جديدة Online

اتعملي لغة جديدة Online

عشان تتعلمي لغة جديدة مش محتاجه سنين، “جوش كوفمان Josh Kaufman” أثبت العكس لما اتعلم لغة البرمجة و ركوب الأمواج و تصوير و تعديل الأفلام في خلال سنة و في لقاء ليه قال ” أنا لا أريد أن أكون عالما أو بروفسور كل ما أريده هو أن أستطيع تحدث اللغه بسهولة ”

لما تيجي تتعلمي لغة جديدة لازم تعرفي انتي عاوزة تتعلميها ليه علشان متضيعيش وقت من غير ماتستفيدي :

١- الجدية: خدي الموضوع بجدية مفيش مشكله انك تستمتعي بوقتك و انتي بتتعلمي لكن خليكي جادة مثلا حددي وقت معين للتعليم مثلا ساعتين كل يوم أو ١٠ كلمات جديده كل يوم.

٢- خطوات التعليم: ابدئي بالحاجات السهلة و المهمة و بعدين الأصعب يعني ابدئي بالحروف و بعدين أهم الكلمات و بعدين القواعد و بعدين تحفظى جمل جاهزة هتستخدميها في المحادثات.

٣-خدي بالك ماتبدئيش بالجمل الجاهزة لأنك كدا هتكوني بتحفظي بدون فهم و مش هتقدري تستفيدي بيها .

٤- اكتبي Notes :بما ان الموبيل دايما في ايدك ف هتستخدميه و انتي بتتعلمي ? النوتس اللي علي الموبيل هتستخدميها في تسجيل الكلمات الجديدة اللي اتعلمتيها مع معناها و حاولي تربطي معناها برسمة تفكرك بيها .

٥- الترجمة :لما تستخدمي القاموس في ترجمة كلمة أو جملة متخليش الترجمة بالعربي لازم تكون نفس اللغه لأن ده هيساعدك انك تفكري بنفس اللغة و كمان هتكتسبي كلمات جديدة .

٦- تدريب العقل و مهاراتك :عشان تكتسبي لغه جديدة لازم تدربي عقلك علي مهارات معينه عشان يقدر يستوعبها، لما تدربي علي مهارة الاستماع تلقائيا كده هتقوي عندك مهارة المحادثة و لما تعودي نفسك علي القراءة تلقائيا هتقوي عندك مهارة الكتابة ? فحاولي انك تسمعي كتير و تقرأي كتير .

٧- الأفلام :حاولي تتفرجي على افلام بنفس اللغه اللي بتتعلميها أو كل يوم مقطع فيديو و خلي الترجمه بنفس اللغة علشان تبقي سامعه نطق الكلمه و شيفاها و لو مفهمتيش كلمه سهل تاخديها و تعرفي معناها كده هتستفادي اكتر .

٨- المحادثة :لازم تكون عندك الشجاعة انك تتكلمي باللغة متخافيش ولا تتكسفي انك تنطقي كلمة غلط في الأول ده طبيعي يحصل لأنك لو مغلطتيش مش هتتعلمي و مع التدريب هتتحسني ف اتجرئى و اتكلمي ?.

٩- القراءة :حاولي تقرأي مقالات في مواضيع انتي بتحبيها أو بتهتمي بيها من المجالات أو الجرايد أو من الإنترنت و انتي بتقرأي اقرئي بصوت عالي عشان تعودي نفسك عليغ نطق الكلام و كده هيكون عندك ثقه في نفسك اكتر لما تيجي تتكلمي لأنك اتعودتي ??.

١٠- الكتابة :حاولي تعبري عن نفسك بالكتابة بنفس اللغة اكتبي اللي حصل في يومك حتى لو صفحة صغيرة المهم انك تعودى نفسك علي الكتابة بنفس اللغة و التفكير بيها كمان ?.

١١- مصادر التعلم :من البيت هتستخدمي الانترنت، من أشهر مواقع في تعليم اللغة الانجليزية

www.CambridgeEnglish.com
www.learnenglishteens.Britishcouncil.org
هتلاقي شرح للGrammer و فيديوهات لتنمية المهارات و كلمات و اختبارات.
و من أشهر المواقع في تعليم اللغة الكورية
www.talktomeinkorean.Com
لما تدخلي علي كلمة curriculum يعني المناهج هتلاقيها متقسمه لمستويات بعد ما تختارى المستوى هتلاقي كذا طريقة للدرس وكل درس فيه ملفات تقدري تحميلها في ملف pdf و ملف mp3 .

و من أشهر المواقع في تعليم اللغة الصينية
www.chineseclass101.com

و كمان هتستخدمي اليوتيوب، من أشهر القنوات في تعليم اللغة الإنجليزية قنوات engvid لأنها عليها اكتر من مدرس و كل مدرس عنده قناة بيشرح فيها دروس متنوعة المميز فيهم انهم اصلا بيدّرسوا اللغه للناس اللي بتسافر و مابتعرفش تتكلم فطريقتهم سهلة للمبتدئين .
و للغة الكورية قناة
Koreanclass101.Com

و للغة الصينية قناة
Chineseclass101.Com

لما تتعلمي لغة مختلفة عن اللغات المعروفة هيكون فرصتك أكبر انك تشتغلي بيها في مجال الترجمة، متخافيش انك تجربي حاجة جديدة لأن ده هيوسع من افاقك و يزود معلوماتك.. جربي و متخافيش ??

#انتي_تقدري #في_ضهر_بعض

مشاركة من || علا عبد الدايم

عن فريق انتربرنيل

شاهد أيضاً

٨ أخطاء تتجنبيها وانتي بتكتبي محتوى.

٨ أخطاء تتجنبيها وانتي بتكتبي محتوى:   ١- انك متعرفيش هدفك: حاجة منطقية اننا نعرف …

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *