الرئيسية / افكار جديده / ٩ خطوات عشان تقدمي خطبة ناجحة.

٩ خطوات عشان تقدمي خطبة ناجحة.

مهارة العرض و انك تتكلمي قُدام عدد كبير من الناس حاجة مش سهلة و محتاجة تدريب كتير و خبرة بس قبل ده كله في دول ٩ خطوات لازم تعرفيهم عن مهارة العرض :

 

١-عرفي نفسك: أهم جزء في الخطبة هتقدميه هو تقديمك لنفسك ودا بيفرق على حسب مكان و موضوع الخطبة طبعا بس المهم إنك تبيني خبرتك و المهارات اللي عندك والحاجة اللي بتميزك عن غيرك في التعريف بنفسك مش تكتفي بخبرتك في الشغل بس.

 

٢- عرفي جمهورك: عشان تعرفي مستوى المعلومات اللي تقوليها والطريقة اللي هتكلمي بيها محتاجة تعرفي سنهم و مستواهم في المادة العلمية اللي هتقدميها وكمان مستواهم الاجتماعي وغيره ومن الطرق اللي تخليكي تعرفي بيها المعلومات دي إنك تسألي المنظمين عن مكان العرض .

 

٣-اعرفي الهدف:

-هدفك: هل الخطبة دي هدفك منها تجميع تمويل ولا توصيل معلومة ولا عرض مهاراتك أو حتى تمرين ليكي في مهارة معينة .

-هدف الجمهور: أسألي دايما نفسك (الجمهور جاي يسمعني ليه؟ أو عايز يسمع ايه؟)

-هدف المكان :محتاجة تعرفي بالضبط ليه وجهلك دعوة انتي بالذات وعايزك تتكلمي في ايه.

 

٤-اعرفي الفكرة الأساسية : (هتتكلمي عن إيه بالضبط) و بعدين فرعي منه نقط وحاولي ماتكونش كتيرة.

 

٥. خطوة البناء : بعد ما كونّتي معلوماتك و الأفكار اللي هتقوليها.. هتقدميها إزاي؟ :

 

-الافتتاحية بتاعة خطبتك ويفضل تبدأيها بحاجة تشد انتباه الجمهور زي قصة او موقف مثلا أو سؤال يثير التفكير.

 

-الرسالة أو الفكرة الأساسية: الموضوع اللي هتكلمي فيه بالنقط المتفرعة منه بترتيب .

 

-الأدلة: ودا اللي بيثبت مصداقية كلامك حاولي يكون كل كلامك موثق من مصادر مختلفة.

 

-الخاتمة: وزي ما اهتمتي انك تعملي مقدمة حلوة و تشد محتاجة تسيبي انطباع حلو وحاجة الجمهور يفتكرك بيها على حسب الموضوع ممكن جملة ملهمة أو الخلاصة بتاعة الخطبة أو لو كنتي بتعرضي منتج أو خدمة معينة قوللهم يشتركوا إزاي .

 

٦-بعد ما بحثنا وعرفنا ورتبنا هنقول ايه نيجي لخطوة هنقوله إزاي؟ :

 

-صوتك: حاولي تخلي نبرة صوتك تعلى وتوطى حسب اللي بتقوليه وكمان العبي في صوتك بحيث يعبر عن احساسك باللي بتقوله هل انتي  مبسوطة، مضايقة، متحمسة.

-لغة االجسد: في الاول حاولي احكمي تحركك ثبتي رجلك في الارض واكتفي بتحريك الجزء العلو (ايديك –دراعك- وشك) ولما تتعلمي تحكمي ثباتك هتتحكمي في حركتك بمعنى انك مش هتتحركي حركة تشتت الجمهور أو تخليهم مش مركزين.

 

٧-اتمرني كتير لحد ما تحسي انك مستريحه وواثقة في نفسك وسجلي لنفسك صوت وصورة عشان تلاحظي الغلطات و تعدليها وممكن تعرضيها لحد متخصص يقولك العيوب.

 

٨-قبل الخطبة مباشرة حاولي متكونيش ساكتة مدة طويلة عشان لما تبدأي كلام متلقيش نبرتك منخفضة زي معظم الناس ما بتبدأ و شرب الماية مهم لتقليل التوتر والهدوء, وضبط التنفس كمان من الحاجات المهمة.

 

٩- اتفرجي على خطب كتيرة ولاحظي العيوب عشان تتجنبيها والعكس , من الحاجات اللي ممكن تشوفيها ومتخصصة في الخطابة (Toast Masters ) ده غير انه بيعمل كل أول وتالت اربعاء من كل شهر ورشة عمل للتمرين على الخطابة في معهد جوتة بالدقي لو حابة تتمرني.

 

و بكده تكوني عرفتي أول الخطوات عشان تعملي خطبة بشكل جديد مع التدريب و الخبرة هتقدري تتغلبي على خوفك من مواجهه الجمهور و تتكلمي بمنتهى الثقه ?.

 

#انتي_تقدرى #في_ضهر_بعض

عن فريق انتربرنيل

شاهد أيضاً

اتعملي لغة جديدة Online

عشان تتعلمي لغة جديدة مش محتاجه سنين، “جوش كوفمان Josh Kaufman” أثبت العكس لما اتعلم …

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *